Ստեփանակերտի Սբ. Հակոբ եկեղեցին

Պատմական ակնարկ

Ստեփանակերտ քաղաքի սուրբ Հակոբ եկեղեցին կառուցվել է 2007 թվականին: Կառուցումը ֆինանսավորել է ամերիկահայ բարերար Ներսես Եփրեմյանը, ով եկեղեցին կառուցել է իր վաղամեռիկ որդու՝ Հակոբի հիշատակին (https://news.am/arm/news/94233.html):

Ճարտարապետա-հորինվածքային նկարագրություն

Եկեղեցին կառուցված է արցախյան սպիտակ քարով, կրող կոնստրուկցիաները, կամարները, թաղերը երկաթբետոնից են: Հատակագծում այն խաչաձև է, արտաքին ծավալներն ունեն փոքր-ինչ ձգված համաչափություն, թեթևակի շեշտված են խաչթևերը, որտեղ կան երեքական լուսամուտներ: Ընդհանուր առմամբ արտաքին տեսքը, ներքին ծավալները նման են Վաղուհասի սուրբ Աստվածածին եկեղեցուն, թեև կան նաև որոշակի տարբերություններ՝ պատուհանների չափերը, բացվածքները, ոճավորումը: Եկեղեցու արտաքին տեսքը զուսպ է, գլխավոր մուտքից անմիջապես վերև զետեղված է շինարարական արձանագրությունը, որից վեր պատկերված է խաչը (նկ. 3): Եկեղեցու տանիքը երկթեք է, կղմինդրածածկ, կենտրոնական մասում տեղադրված է փոքրիկ զանգակատուն: Եկեղեցու աղոթասրահը սյուներով բաժանված է երկու մասի: Առաջին սրահն ունի մոտավորապես քառակուսի հատակագիծ, իսկ երկորդ սրահն ուղղանկյուն է (նկ. 4, 5):