Չափար գյուղի ‹‹Շենատեղի եղցե›› եկեղեցին

Պատմական ակնարկ

Եկեղեցու մասին պատմական տեղեկությունները բացակայում են: Մակար Բարխուդարյանցը, նկարագրելով Չափար գյուղը, նշում է, որ ‹‹…եկեղեցին, հանգստարանն խիստ հին են…: Սկսեալ Չափար շինից մինչև Խոթայ վանք, մինչև Եանշաղ կան շատ աւերակներ, որոնց մէջ կան աւերակ եկեղեցիներ և մօտերքում հանգստարաններ›› (Բարխուտարեանց 1895, 203):

Չափար գյուղը հիշատակվում է Դադիվանքի, Չարեքտարի վանքերի վիմագրերում (ԴՀՎ 5, 133, 216):

Ճարտարապետա-հորինվածքային նկարագրություն

Եկեղեցին եռանավ թաղակապ սրահ է: Կառուցված է կոպտատաշ փոքր ու միջին չափերի քարերով, կրաշաղախով (նկ. 2, 3):  Հուշարձանի վրա ներքուստ ագուցված են մի շարք խաչքարեր, որոնցից մի քանիսի վրա երևում են արձանագրություններ: Խաչքարերը 12-13-րդ դարերի են (նկ. 4-6): Եկեղեցին, թերևս, կառուցվել է 17-րդ դարում: Այդ է հուշում նրա արտաքին տեսքը, ներսույթը: Եկեղեցին ներքուստ սվաղված է:

Եկեղեցու մոտ երևում են միջնադարյան գյուղի տների պատերի մնացորդներըն ու փոսորակները: