Մայիսի 30-ին Վահե Հարությունյանը ֆեյսբուքյան հարթակում տեղադրեց արբանյակային լուսանկարներ, որոնցից հստակ երևում է, որ Ադրբեջանը քանդել, և հողին է հավասարեցրել Արցախի Հանրապետության Ասկերանի շրջանի Սղնախ գյուղի  գերեզմանոցը, որը հիմնվել է 18-րդ դարի կեսերին և գործում էր մինչև օկուպացումը։

Տեղում կատարած դիտումները թույլ են տալիս ենթադրել, որ տարածքը վերածվել է շինհրապարակի։ Երկրորդ և երրորդ նկարներում սլաքները ցույց են տալիս հանքի և գերեզմանատան միջև ճանապարհը։ Չորրորդ նկարում երևում է տնակ, որը հենց գերեզմանատան մեջ է։ Ըստ էության գերեզմանատնից ոչինչ չի մնացել։

Ի պատասխան Ադրբեջանի՝ Սղնախ գյուղի գերեզմանոցի ավերման գործողությունների, հարկ ենք համարում հիշեցնել, որ «Զինված բախումների  դեպքում մշակութային արժեքների պաշտպանության մասին» կոնվենցիայի առաջին արձանագրության՝ գրավյալ տարածքներում արգելված է ոչնչացնել մշակութային կամ հոգևոր արժեքները։ Հաագայի 1999 թվականի երկրորդ արձանագրությունը վերահաստատում է այս պահանջը և  այդպիսի արարքը՝ ըստ 15-րդ հոդվածի, որակում որպես միջազգային հանցագործություն։ Մշակութային արժեքների ոչնչացման գործողություններն արգելվում են նաև Ժնևի 1949 թվականի օգոստոսի 12-ի պատերազմից տուժածների պաշտպանության, պատերազմի օրենքների և սովորույթների վերաբերյալ միջազգային չորս կոնվենցիաների և արձանագրութունների, ինչպես նաև ՄԱԿ-ի համապատասխան բանաձևերի և Մարդու իրավունքների պաշտպանության պայմանագրերի կողմից։

Թարմացում

Ըստ CBC TV Azerbaijan լրատվամիջոցի 2021 թվականի հուլիսի 16-ին հրապարակած ռեպորտաժի՝  մեկնարկել է   Ահմեդբեյլի-Ֆիզուլի-Շուշի ավտոճանապարհային  թունելների  կառուցումը, որի հիմքը դրվել է 2021 թվականի հունվարի 14-ին՝ նախագահ Իլհամ Ալիևի՝ Ֆիզուլիի տարածաշրջան կատարած ուղևորության ժամանակ։  Պատմական գերեզմանոցի տարածքն ընդգրկող  թունելի կառուցումը ըստ աղբյուրի՝  ղարաբաղյան տրանսպորտային միասնական միակ  համակարգի անբաժանելի  մասն է։ Ճանապարհը, որտեղ պետք է լինեն կամուրջներ և թունելներ, ունենալու է 84,6 կմ երկարություն, որի կառուցման շինարարական աշխատանքների մի մասը կատարելու է ադրբեջանական AZVİRT, իսկ մյուս մասը՝ թուրքական Kolin İnşaat  կազմակերպությունը։

Նյութի աղբյուրը՝ https://www.youtube.com/watch?v=RSPsWr5Ftog

Ադրբեջանական մեկ այլ լրատվական ՝ www.news.day.az -ի կայքի  հաղորդմամբ, Ահմադբեյլի-Ֆիզուլի-Շուշի ավտոճանապարհի   կառուցումից հետո մայրուղու վրա  նախատեսվում է  բազմաստիճան ճանապարհային հանգույցների կառուցումը, իսկ շինարարությունն, ըստ նախագծի, պլանավորված է ավարտել  2022 թվականին։ Նյութի աղբյուրը՝ https://www.youtube.com/watch?v=yWD0wLD9N1w