Բերդաձորի կամուրջը

Պատմական ակնարկ

Կամուրջը կարևոր նշանակություն ուներ Շուշիի Բերդաձորի ենթաշրջանի բնակավայրերի համար, հատկապես՝ գարնանային վարարումների ժամանակ։ Կամրջի շինարարության վերաբերյալ տեղեկություններ չկան։ Ըստ տեղաբնակների վկայության՝ այն կառուցվել է 1920-ական թվականներին։ Հին կամրջի վրա հետագայում երկաթբետոնով կառուցվել էր ավելի լայն ավտոմոբիլային անցուղի, որն օգտագործվում էր բնակիչների կողմից։

Ճարտարապետա - հորինվածքային քննություն

Միաթռիչք կամարակապ կամուրջ է։ Կառուցված է տեղական կոպտատաշ, սրբատաշ քարերով և կրաշաղախով։ Սրբատաշ են միայն կամարի անկյունաքարերը։ Թռիչքի երկարությունը 5,50 մետր է, անցուղու լայնությունը՝ 4,35 մետր,  բարձրությունը՝ 4,25 մետր (Կարապետյան 2009, 139)։

 Վիճակը պատերազմից առաջ, ընթացքում և հետո

Մինչև 2023 թվականի պատերազմը կամուրջը կանգուն էր։ 2023 թվականի սեպտեմբերի 19-20 ռազմական գործողությունների հետևանքով Արցախն ամբողջությամբ բռնազավթվել է Ադրբեջանի կողմից։ Հայ բնակչությունը բռնությամբ տեղահանվել է։ Հուշարձանի ներկա վիճակի մասին տեղեկությունները բացակայում են:

Գրականություն

Կարապետյան 2009 - Կարապետյան Ս․, Արցախի կամուրջները, Երևան։