Սոս գյուղի Սբ. Գևորգ եկեղեցին

Պատմական ակնարկ

Եկեղեցու մասին պատմական տվյալները բացակայում են: Հիմք ընդունելով ծավալային լուծումն ու շինարարական տեխնիկան, այն կարելի է թվագրել 19-րդ դարով: Եկեղեցու մասին միակ վկայությունը տալիս է Մակար Բարխուդարյանցը. «…եկեղեցին Սուրբ Գէորգ, քարուկիր, առանց կամարի և սեան. երկարութիւնն է 12 մետր 60 սանթիմ, լայնութիւնն 7 մետր 90 սանթիմ։ Դրան ճակատակալ քարի վերայ. «Զայս պատուիրեմ, զի սիրեսջիք զմիմեանս»… (Բարխուտարեանց 1895, 116):

Ճարտարապետա-հորինվածքային նկարագրություն

Եկեղեցին միանավ, թաղակապ սրահ է՝ ներառաված պարսպապատ բակի մեջ (նկ. 1, 2): Կառուցված է փոքր ու միջին չափերի կոպտատաշ տեղական սպիտակավուն կրաքարով, սրբատաշ են լուսամուտների շրջանակները և անկյունաքարերը: Միակ մուտքը հյուսիսային ճակատից է: Բոլոր ճակատներում բացված են մեկական լայն լուսամուտ: Սրահի թաղն ու կիսաշրջան բարձր բեմն ունեն ընդգծված սլաքաձև ծավալ (նկ. 3): Պատերը ներսից ծածկված են սվաղով: Թիթեղյա ծածկը փլուզված է, պարիսպը՝ զգալիորեն վնասված:

Գրականություն

1. Բարխուտարեանց 1895 - Բարխուտարեանց Մ., Արցախ, Բագու: