Պատմական ակնարկ
Աղբյուրի կառուցման մասին ստույգ տեղեկություններ չկան: Ըստ հետազոտող Մ. Սարգսյանի՝ այն կառուցվել է 19-րդ դարում, իսկ վերջնական տեսք է ստացել 20-րդ դարասկզբին, երբ աղբյուրը ծածկվել էր միաթեք կղմինդրե տանիքով (Սարգսյան 1986, 63):
Ճարտարապետա-հորինվածքային նկարագրություն
Տաք գյուղի աղբյուրն իր համալիրով Արցախի ամենաընդարձակ ու ճարտարապետորեն ձևավորված աղբյուրներից մեկն է: Աղբյուրի համալիրը կազմված է ռելիեֆին ձուլվող ջրամբարից, որի կողքին գտնվում են երեք մեծ սոսիներ: Վերջիններից մեկի տակ մի հատված շրջափակված է ոչ բարձր քարե պատով և ծառայում է որպես գյուղական հավաքատեղի (նկ. 2): Բուն աղբյուրի կառույցը հարում է լեռան թեք լանջին:
Աղբյուրը կառուցված է տեղական փոքր ու միջին չափի կրաքարով, կրաշաղախով (նկ. 3): Ծածկը կղմինդրապատ է: Կառույցի հիմնական հատվածը թաղակապ սրահ է, որի ձախ հատվածում՝ պատի մեկ առկա է պատրհան (նկ. 4): Սրահի թաղի մեծ թեքության պատճառով թաղի աջ հենարանը լայնացրել են և տվել որմնահեցի տեսք: Ջուրը կուտակվում էր ստորգետնյա նեղ թաղածածկ ամբարում, որտեղից մի քանի ծորակով հոսում էր դուրս՝ լցվելով կամարի տակ գտնվող քարե նավերը (Սարգսյան 1986, 63-64, Կարապետյան 2023, 64-65):
