Քյաթուկ գյուղի Սբ․ Աստվածածին եկեղեցին

Ճարտարապետա-հորինվածքային նկարագրություն

Սբ. Աստվածածին եկեղեցին ուղղանկյուն սրահ է, արևելյան ուղղանկյուն խորանով: Կառուցված է միջին չափի կոպտատաշ սպիտակ կրաքարով (նկ. 2), սրբատաշ են միայն անկյունաքարերը, լուսամուտների և մուտքի եզրագոտիները, մուտքի բարավորը (նկ. 3): Եկեղեցու մուտքը հարավային կողմում է: Բարավորին արձանագրություն չկա:  Մուտքից աջ և ձախ երկու մեծ լուսամուտներ են: Եկեղեցին ներքուստ ունեցել է զուսպ հարդարանք, խորհրդային տարիներին պատերը ծածկվել են սվաղով (նկ. 4, 5): Բեմը չի պահպանվել: Արևելյան կողմում կա ուղղանկյուն պարզ լուսամուտ: Պարզ լուսամուտ է եղել նաև արևմտյան ճակատում, սակայն այն չի պահպանվել: Մկրտության ավազանը կառուցված է սրբատաշ քարերով, գրեթե զուրկ է հարդարանքից, միայն կամարի ձախ անկյունում զարդարուն փոքրիկ խաչ է փորագրված (նկ. 6):