Պատմական ակնարկ

Պատմական Տեղ բնակավայրը հիշատակվում է դեռևս 10-րդ դարից, երբ Սյունյաց Շահանդուխտ թագուհին 988 թվականին հիմնում և շենացնում է գյուղը՝ այն նվիրելով Տաթևի վանքին (Օրբէլեան 1910, 252)։

Տեղ գյուղի հուշարձաններից է Քարե օթաղը կամ Քարե տունը, որը թաղածածկ սենյակներից բաղկացած բնակելի համալիր է։ Այն գտնվում է գյուղի կենտրոնում՝ Սբ․ Գևորգ եկեղեցուց հարավ-արևելք։ Հուշարձանի վերաբերյալ պատմական տեղեկություններ չկան, կառույցի վրա չկան և արձանագրություններ։

Ճարտարապետական-հորինվածքային քննություն

Քարե օթաղը ներսից և դրսից սրբատաշ քարերով կառուցված բնակելի համալիր է, կամ համալիրից պահպանված մի հատված, որը, հաշվի առնելով ճարտարապետական-հորինվածքային լուծումները (մուտքերը, սրահները, պատրհանները և այլն) կարելի է թվագրել 17-18-րդ դարերով։ Շինությունը կառուցված է լանջի վրա, արդյունքում հյուսիսային կողմից տանիքը հավասարված է ճանապարհին, իսկ հարավային կողմը կրկնակի բարձր դիրքում է։

Կառույցը կազմված է իրար կից հյուսիս հարավ ձգվող երկու թաղածածկ սրահներից, որոնք իրար հետ հաղորդակցվում են միջնորմ պատի հարավային հատվածում բացված մուտքով (նկ․ 2)։ Երկու սրահներն էլ հյուսիսային կողմում ունեն բուխարի, որոնց երկու կողմերում առկա են պատրհաններ (նկ․ 3)։ Պատրհաններ են բացված նաև պատերի այլ հատվածներում, առկա են նաև երկարավուն քարե դարակներ՝ տնային իրերը դնելու համար (ԴՀՎ 2, 66)։ Կառույցի մուտքը գտնվում է արևելյան կողմում և իրականացված է մեծածավալ սրբատաշ քարերով (նկ․ 4)։