Ավդուռ գյուղի Սբ․ Աստվածածին եկեղեցին

Ճարտարապետա - հորինվածքային քննություն

Եկեղեցին միանավ ուղղանկյուն սրահ է, արևելյան կողմում ուղղանկյուն խորանով և զույգ ավանդատներով։ Ունի 12,7 մետր երկարություն, 6,45 մետր լայնություն, 5,7 մետր բարձրություն: Թաղը հենված է երկու զույգ որմնասյուներից բարձրացող թաղակիր կամարների վրա (նկ․ 4)։ Տանիքը երկթեք է, ծածկված ասբեստե շիֆերով։ Շքամուտքը բացվում է հարավային կողմից, լուսավորությունը ստանում տարբեր ուրվագիծ ունեցող թվով երեք լուսամուտներից։ Շքամուտքը կառույցի միակ գեղարվեստական կատարում ունեցող հանգույցն է (նկ. 5): Այն կառուցված է համակ սրբատաշ քարերով և ունի 17-19-րդ դարերի համար դասական ծավալային և քանդակային լուծում. զանգվածեղ խարիսխների վրա բարձրացող ուղղանկյուն տրամատավորումով եզրասյուներ, սալիկատեսք խոյակներ, որոնք հարդարված են կոնատեսք քանդակաշարով:

Բարավորը ներառող կրկնակի եզրագոտին պարանահյուս է, բուն բարավորը երիզում է նույն կոնատեսք քանդակաշարը, շինարարական արձանագրությունը ներառված է եկեղեցական կառույցի ուրվագիծ հիշեցնող շրջանակի մեջ, որի կենտրոնական հատվածը պսակում է զարդարուն խաչաքանդակը (նկ. 6): Շինարարական արձանագրությունից ներքև փորագրված են Մատթեոսի ավետարանի հետևյալ խոսքերը. «Հայցեցէք եւ գտջիք, բաղխեցէք եւ բացցի ձեզ» (Մատթէոս, 7։7)։

Եկեղեցին խորհրդային տարիներին օգտագործվել է տնտեսական նպատակներով, հենց այդ ժամանակ էլ եկեղեցու հարավային ճակատին կից կառուցվել է լրացուցիչ շինություն։