Ասկերան քաղաքի Սբ․ Աստվածածին եկեղեցին

Պատմական ակնարկ

Ասկերանի քաղաքի Սբ․ Աստվածածին եկեղեցին կառուցվել է 2002 թվականին Բարսեղ Բեգլարյանի բարերարությամբ: Եկեղեցին կառուցվել է Հայաստանում քրիստոնեության ընդունման 1700-ամյակի կապակցությամբ որպես Ասկերան քաղաքին նվեր, քանի որ բնակավայրը եկեղեցի չի ունեցել: Եկեղեցին կառուցվել է ՀԽՍՀ վաստակավոր ճարտարապետ Սարգիս Գուրզադյանի նախագծով: Եկեղեցու պաշտոնական օծումը տեղի է ունեցել 2002 թվականի նոյեմբերի 9-ին (անկախությունից ի վեր Արցախում 12 եկեղեցի է կառուցվել, https://hetq.am/hy/article/64015, Ասկերանի Սբ․ Աստվածածին եկեղեցին 17 տարեկան է https://artsakhtert.com/arm/index.php/spiritual/item/27822-17 ):

Ճարտարապետա-հորինվածքային նկարագրություն

Ասկերանի Սբ․ Աստվածածին եկեղեցին կառուցված է կապտավուն սրբատաշ բազալտ քարով: Կրող կոնստրուկցիաները, կամարները, թաղերը երկաթբետոնից են:

Եկեղեցին ունի խաչաձև հատակագծային լուծում, կենտրոնագմբեթ է: Եկեղեցու գմբեթը նիստավոր է, պսակվում է հովհարաձև վեղարով (նկ. 3, 4): Եկեղեցու արևմտյան կողմում գտնվում է կամարակապ բացվածքով նախասրահը, որի կենտրոնում տեղադրված է եկեղեցու միակ մուտքը, որից վերև գտնվում է շրջանաձև մեծ պատուհանը (նկ. 5): Նախասրահի արևմտյան ճակատի երկու կողմերում կան եռանկյունի խորշեր, որտեղ յուրաքանչյուրում տեղադրված է մեկական խաչքար (նկ. 6, 7, 8):