Սառնաղբյուր գյուղի սբ․ Գևորգ եկեղեցին

Տեղադրությունը

Սբ․ Գևորգ եկեղեցին գտնվում է Արցախի Հանրապետության Ասկերանի շրջանի Սառնաղբյուր գյուղի արևմտյան եզրին, թեքադիր լանջի վրա (նկ․ 1)։

Գյուղի և եկեղեցու վերաբերյալ տեղեկություններ է հաղորոդում Մակար Բարխուդարյանցը. «Միրիշալլու գիւղ. հիմնուած է Աղուէ գաւառի դաշտաբերանում, բնակիչք տեղափոխուած Բէլուկան քաղաքից շատ վաղուց, հողն բէկական, բեղմնաւոր, տեղական բերքերն նոյն, օդն և կլիման ծանր ամրան, երկար կեանք 65-70, եկեղեցին սուրբ Գէորգ, խախտեալ, քահանան գալիս է Դահրազից։ Ծուխ 55. ար. 194. իգ. 175» (Բարխուտարեանց 1895, 127)։ Ինչպես տեսնում ենք, ըստ Բարխուդարյանցի՝ 19-րդ դարի վերջերին եկեղեցին արդեն իսկ վթարային վիճակում էր։

Հյուսիսային ավանդատան մուտքի վերնամասում, որպես բարավոր ագուցված խաչքարը վկայում է  ներկայիս եկեղեցուն նախորդած շատ ավելի վաղ կառույցի կամ սրբավայրի մասին (նկ․ 4)։

Վիճակը պատերազմից առաջ, ընթացքում և հետո

Սառնաղբյուր գյուղն արցախյան առաջին պատերազմի ժամանակ մարտական թեժ գործողությունների գոտում է գտնվել, ուժգին հրետակոծության և գնդակոծության է ենթարկվել։ Գյուղը բնակելի շինությունները և  պատմամշակութային կոթողները ահռելի վնասներ են կրել։ Եկեղեցու թաղածածկը փլուզվել է, պատերին առաջացել են խոռոչներ և ճաքեր (նկ․ 9)։

Ընդհանուր առմամբ եկեղեցին գտնվում է անմխիթար վիճակում։  2020 թվականի պատերազմի ժամանակ հուշարձանը չի վնասվել։